ಕೊಯಮತ್ತೂರು: ನಟ ಶಿವಕಾರ್ತಿಕೇಯನ್ ಮತ್ತು ನಟಿ ಸಾಯಿ ಪಲ್ಲವಿ ಅಭಿನಯದ ರಾಜ್‌ಕುಮಾರ್ ಪೆರಿಯಸಾಮಿ ನಿರ್ದೇಶನದ ‘ಅಮರನ್’ ಚಿತ್ರವು ತಮಿಳುನಾಡಿನ ಹೆಚ್ಚಿನ ಸ್ಕ್ರೀನ್‌ಗಳಲ್ಲಿ ಬಿಡುಗಡೆಯಾಗಿದೆ. ಯೋಧ ಮುಕುಂದ್ ಅವರ ಜೀವನದ ಕಥೆಯನ್ನು ಹೇಳುವ ಈ ಚಿತ್ರವು ಭಾರತದ ಬಹುತೇಕ ಜನರಿಂದ ಉತ್ತಮ ಪ್ರತಿಕ್ರಿಯೆ ಪಡೆದಿದೆ.
ಈ ಹಿನ್ನೆಲೆಯಲ್ಲಿ, ಚಿತ್ರದಲ್ಲಿ ಮುಸ್ಲಿಮರ ವಿರುದ್ಧ ದ್ವೇಷ ಬಿತ್ತುವ ಹಾಗೂ ಧಾರ್ಮಿಕ ಸಾಮರಸ್ಯ ಹಾಳು ಮಾಡುವ ದೃಶ್ಯಗಳಿವೆ ಎಂದು ಆಪಾಧಿಸಿ, ಎಸ್‌ಡಿಪಿಐ (SDPI) ಪಕ್ಷದ ಕಾರ್ಯಕರ್ತರು, ತಮಿಳುನಾಡಿನ ವಿವಿಧೆಡೆ ಚಿತ್ರ ಪ್ರದರ್ಶನಗೊಳ್ಳುತ್ತಿರುವ ಥಿಯೇಟರ್‌ಗಳಿಗೆ ಮುತ್ತಿಗೆ ಹಾಕಿ ಪ್ರತಿಭಟನೆ ನಡೆಸಿದ್ದಾರೆ.
ಅದರ ಒಂದು ಭಾಗವಾಗಿ ಕೊಯಮತ್ತೂರು ಜಿಲ್ಲೆಯ ಎಸ್‌ಡಿಪಿಐ ಪಕ್ಷವು ಕೊಯಮತ್ತೂರು ರೈಲ್ವೆ ನಿಲ್ದಾಣದ ಶಾಂತಿ (ಖಾಸಗಿ) ಥಿಯೇಟರ್‌ಗೆ ಮುತ್ತಿಗೆ ಹಾಕಿ ಪ್ರತಿಭಟನೆ ನಡೆಸಿದ್ದರು.
ನೂರಾರು ಮಂದಿ ಕಾರ್ಯಕರ್ತರು ಜಮಾಯಿಸಿ ಥಿಯೇಟರ್ ಬಳಿ ಬರುತ್ತಿದ್ದಂತೆ ಪೊಲೀಸರು ಬ್ಯಾರಿಕೇಡ್ ಹಾಕಿ ತಡೆದರು. ಬ್ಯಾರಿಕೇಡ್‌ಗಳನ್ನು ಭೇದಿಸಲು ಯತ್ನಿಸಿದವರನ್ನು ಪೊಲೀಸರು ತಡೆದು ನಿಲ್ಲಿಸಿದರು. ಇದರಿಂದ ನಡು ರಸ್ತೆಯಲ್ಲೇ ಕುಳಿತು ಪ್ರತಿಭಟನೆ ನಡೆಸಿದರು.
ನಂತರ ಪೊಲೀಸರು ಅವರನ್ನು ಬಂಧಿಸಿ ಕರೆದೊಯ್ದರು. ಇದರಿಂದ ಈ ಭಾಗದಲ್ಲಿ ಕೆಲಕಾಲ ವಾಹನ ಸಂಚಾರ ಅಸ್ತವ್ಯಸ್ತಗೊಂಡು ಬಿರುಸಿನ ವಾತಾವರಣ ನಿರ್ಮಾಣವಾಗಿತ್ತು.
ಈ ಕುರಿತು ಮಾಧ್ಯಮದವರೊಂದಿಗೆ ಮಾತನಾಡಿದ ಎಸ್‌ಡಿಪಿಐ ರಾಜ್ಯ ಉಪ ಕಾರ್ಯದರ್ಶಿ ರಾಜಾ ಹುಸೇನ್, “ಅಮರನ್ ಚಿತ್ರದಲ್ಲಿ, ಒಬ್ಬ ವ್ಯಕ್ತಿಯನ್ನು ಗುಣಗಾನ ಮಾಡಲಿಕ್ಕಾಗಿ ಸಮಾಜದಲ್ಲಿರುವ ಎಲ್ಲರನ್ನು ಅಪರಾಧ ವಂಶಸ್ಥರೆಂದು ಬಿಂಬಿಸಲಾಗಿದೆ” ಎಂದರು.
“ಈ ಚಿತ್ರದಲ್ಲಿ ಯೋಧನ ಕಥೆಯನ್ನು ತೋರಿಸುವ ಚಿತ್ರರಂಗ ಕಾಶ್ಮೀರದ ಇನ್ನೊಂದು ಮಗ್ಗುಲನ್ನು ತೋರಿಸುವಲ್ಲಿ ವಿಫಲವಾಗಿದೆ” ಎಂದು ಆಪಾದಿಸಿದರು. “ನಿಜವಾದ ಇತಿಹಾಸ ಎಂದು ಹೇಳುವ ಈ ಕಥೆಯಲ್ಲಿ ಅಲ್ಲಿ ನಿಜವಾಗಿಯೂ ಏನು ನಡೆಯುತ್ತಿದೆ ಎಂಬುದನ್ನು ಮರೆಮಾಚಿ ತೋರಿಸಲಾಗಿದೆ” ಎಂದು ಟೀಕಿಸಿದರು.
“ಕಾಶ್ಮೀರದಲ್ಲಿ ವಿವಿಧ ಮಹಿಳೆಯರು ಯುವ ವಿಧವೆಯರಾಗಿ ಬದುಕುತ್ತಿದ್ದಾರೆ ಎಂಬ ಮಾಹಿತಿ ನೀಡಿದ ಅವರು, ಅಲ್ಲಿರುವ ಪೊಲೀಸ್ ಇಲಾಖೆ ಮತ್ತು ಸೇನೆ ಅಲ್ಲಿರುವವರನ್ನು ಬಂಧಿಸಿ ಜೈಲಿಗಟ್ಟಬಹುದನ್ನೇ ಮಾಡುತ್ತಿದೆ” ಎಂದು ಹೇಳಿದರು.
“ಅಮರನ್ ಚಿತ್ರವು ತಮಿಳುನಾಡಿನ ಜನರಲ್ಲಿ ಧಾರ್ಮಿಕ ದ್ವೇಷವನ್ನು ಪ್ರಚೋದಿಸುವಂತೆ ಮೂಡಿಬಂದಿದ್ದು, ಅಲ್ಪಸಂಖ್ಯಾತರ ಕಾವಲುಗಾರ ಎಂದು ಹೇಳಿಕೊಳ್ಳುವ ತಮಿಳುನಾಡು ಮುಖ್ಯಮಂತ್ರಿ ಸಿನಿಮಾವನ್ನು ಬ್ಯಾನ್ ಮಾಡುವ ಬದಲು ಅದನ್ನು ಹಾಡಿಹೊಗಳಿರುವುದು ವಿಷಾದನೀಯ” ಎಂದು ರಾಜಾ ಹುಸೇನ್ ಕಿಡಿಕಾರಿದ್ದಾರೆ.
